धादिङको गजुरीस्थित नेपाली सेनाको ब्यारेक क्षेत्रमा पछिल्लो समय सर्वसाधारणको खुला आवतजावत बढेपछि नेपाली सेनाले त्यसप्रति गम्भीर ध्यानाकर्षण जनाएको छ। ब्यारेक जस्तो संवेदनशील क्षेत्रमा अनधिकृत व्यक्तिहरू सहज रूपमा प्रवेश गर्न थालेपछि सेनाले ‘प्रवेश निषेध’ सम्बन्धी सूचना टाँसेर सर्वसाधारणलाई सतर्क रहन आग्रह गरेको हो।
बिज्ञापन
गजुरी गाउँपालिका–१ मा रहेको भैरव गणले आफ्नो नियन्त्रण क्षेत्रभित्र अनधिकृत रूपमा प्रवेश नगर्न स्थानीय बासिन्दा तथा यात्रुहरूलाई औपचारिक रूपमा सूचित गरेको छ। सेनाका अनुसार पछिल्लो समय ब्यारेकको घेराभित्र अनुमति बिना विभिन्न व्यक्तिहरू प्रवेश गर्ने र आवतजावत गर्ने क्रम देखिएकाले सुरक्षाको दृष्टिले यस्तो चेतावनी जारी गरिएको हो।
बिज्ञापन
ब्यारेक जस्ता संवेदनशील सैन्य संरचनाहरू राष्ट्रिय सुरक्षासँग प्रत्यक्ष जोडिएका क्षेत्र मानिन्छन्। त्यसैले त्यस्ता स्थानहरूमा ‘प्रवेश निषेध’ लेखिएका सूचना वा चिन्हहरूलाई गम्भीरतापूर्वक पालना गर्नुपर्ने सेनाले जनाएको छ। सेनाको नियन्त्रणमा रहेका क्षेत्रहरूमा अनावश्यक रूपमा प्रवेश गर्नु वा आवतजावत गर्नु सुरक्षा व्यवस्थाका लागि जोखिमपूर्ण हुन सक्ने भएकाले हेलचेक्राईं नगर्न सेनाले आग्रह गरेको बुझिन्छ।
यता, भदौ २३ गते भएको ‘जेनजी’ प्रदर्शन र त्यसपछिको दिन विभिन्न स्थानमा भएको तोडफोड तथा आगजनीको घटनाले मुलुकको सुरक्षा संयन्त्रको मनोबलमाथि असर परेको चर्चा पनि चलिरहेको छ। उक्त प्रदर्शनपछि सिंहदरबार, संसद भवन, सर्वोच्च अदालत, राष्ट्रपति भवन, प्रहरी कार्यालय तथा विभिन्न सरकारी र निजी संरचनाहरूमा आक्रमण र आगजनी भएको घटनाले सुरक्षा निकायहरूको भूमिकामाथि प्रश्न उठेको थियो।
बिज्ञापन
यही पृष्ठभूमिमा अहिले सेनाको नियन्त्रण क्षेत्रभित्रै सर्वसाधारणको सहज आवतजावत देखिनु पनि सुरक्षा दृष्टिले चिन्ताजनक विषयका रूपमा हेरिएको छ। संवेदनशील सैन्य क्षेत्रहरूमा प्रवेश नियन्त्रण प्रभावकारी रूपमा कार्यान्वयन हुन नसके सुरक्षा व्यवस्थामाथि थप प्रश्न उठ्न सक्ने विश्लेषकहरूको भनाइ छ।
स्थानीय तह, सुरक्षा निकाय र सर्वसाधारणबीच समन्वय नहुँदा यस्ता संवेदनशील क्षेत्रहरूमा अनधिकृत प्रवेशको जोखिम बढ्न सक्ने भएकाले सम्बन्धित सबै पक्ष सचेत हुनुपर्ने देखिन्छ। नेपाली सेनाले पनि अब यस्ता क्षेत्रमा सुरक्षा निगरानी कडा पार्दै अनधिकृत प्रवेश पूर्ण रूपमा रोक्ने तयारी गरेको संकेत दिएको छ।
